Go son ja su olmmái sihkkelasttiiga giliid gaskkas 8-jahkásažžan de leigga máilmmi čeahpimus juoigit. Soai sihkkelasttiiga, juoiggaiga ja ságasteigga sudno stuoravuođa birra. Eanetgo logi jagi maŋŋil de juoiggai Simon Issát Marainen vuosttas gearddi gehččiid ovddas. Dat ledje turisttat Čohkkirasas.
– Mus lei liigebargu ofelažžan, ja in liikon nu olu japmat. Turisttat liikoje go juigen.
Jagiid 2001-2002 de válddii luohti badjelasat. Ovdal dan son lei čállán divttaid ja noveallaid earret eará Š-bláđis ja girjjiin Viidát – divttat Sámis ja Älskar, älskar inte – nordiska ungdomsnoveller.
– Dál lean iežan mielas juoigi ja dan maid čálán leat dávjjimusat luohtedajahusat.
Teavstta čállit lea eanet lunddolaš go lea juo luohti.
– Lea nu olu fokus tekstii go čállá buhtes poesiija, lea álki vuodjut ilá čiekŋalit tekstii. Luođis leat máŋga oasi mat galget soahpat ovttas, vaikko lea ge eanet friddja go lávlun.
Luođit bohtet dávjá Simon Issáhii soames báikkis dehe dáhpáhusas.
– Musihkalaš oasit bohtet meastta álot visot ovttatmanu. Deaddilan REC telefovnnas ja bádden. Ja de fas logi minuhtta maŋŋil. Ja de fas diimmu maŋŋil.
Dađi mielde luohti muhtto ja šaddá. Maiddái luohtedajahusat leat dehálaččat. Issát Sámmol Hætta, gii lea leamaš aktiiva sihke Sámi girječálliid searvvis ja Juoigiid searvvis, lea Sámi grand prix oktavuođas lohkan ahte luohti lea massime dajahusaid. Simon Issát Marainen lea ovttaoaivilis. Lea váivi go olu luođit leat beare šuoŋat.
– Mu mielas ii leat luohti válmmas jus eai leat sánit. Gal doppe leat spiehkastagat, muhto ollislaččat háliidan váldit vára luohtepoesiija sániin. Dat addá liige dimenšuvnna ovdanbuktimii. Historjjá lea nu got lea, lohká son. Luohti lea seilon buoret go giella. Ollosat eai dovdda šat iežas luohtesuopmaniid. Suopmanat jávket. Jáhkká iežas diehtit, oahppa rádio čuojahanlisttus ja gohčoda iežas juoigin. Muhto ii leat nu álkit.
– Mis sámi álbmogis lea ovddasvástádus váldit luođi duođas. Mii leat manname dan guvlui ahte “buohkat máhttet juoigat”. Muhto mii fertet suddjet luođi vuođđoárvvuid.
Pia Sjögren
Jorgaleaddji Lea Simma
Simon Issáha ovdagovat
Thomas Egemyr Ponga
Máreha Lásse
Mari Boine
Áillohaš