Fredrik Prost lea Viikusjávrris eret, Vazáš čearus. Son lea 2011 rájis olles áiggi duojár muhto lea duddjon unni rájis. 2001 son duddjogođii ja dutkagođii sámi noaidegáriid ja 2017 son mearridii čállit girjji sámi vuoiŋŋalašvuođa ja gáriid birra. Girji almmuhuvvo DAT-lágádusas 2022 ja lea vuosttáš olles girji maid son lea čállán. Girji lea sihke áššeteavsttat gáriid birra ja dramatiserejuvvon duohta muitalusat, girjji bakto lohkki beassá oahpástuvvat sámi vuoiŋŋalašvuhtii ja oahppat árbevieru birra. Girjji lea Inga-Wiktoria Påve illustreren.

Fredrik prost lea ovdal čállán olu oanit teavsttaid iežas bloggii ja muhtin aviissaide, ee. Side-Magazinii. 2018 son váccii čállingursse sámi girječálliin Annica Wennströmiin ja son lea lohkan sámigiela Sámi Allaskuvllas, Guovdageainnus.

Son čállá ruoŧagillii, sámigillii ja eŋgalasgillii.
contact[@]fredrikprost.com