Julevsámegiellaj. LulesamiskaNovellerNuoraide. För ungdomarRovmaane. Prosa

Sån la dävddám 21 valla juo vuojttám gålmmå tjállemgilbbusa. Márjju danna l aktavuohta dajna at sån lij tjálle åvddål gå máhtij tjállet. Akta suv vuostasj giehttojs lij gieddemuorjje mij manáj ietjas manojt. Dav ja ålov iehtjásav biedjin suv äjgáda tjállagij. 

– Mån åvvå álu tjálliv juhtusij birra, ij nåv álu ulmutjijs. Dat la ihkeve suohtas at miján li ájmon ålo muv “girjijs”. Mån sárgguv aj, subtsas Moa Backe Åstot.

Dálla sån vádtsá suv vuostasj tjálleskåvlåv, Tjále! – Projäkta: Tjáppagirjálasjvuohta guhkásåhpadimen Jakobsberga álmmukallaskåvlån Stockhålman. Dat la bielleájggeåhpadus. Nuppen oasen sån låhkå julevsámegielav Ubbmema universitehtan, dav aj guhkásåhpadimen.  

Ja maŋŋel ålo novella, tjállá Moa dal suv vuostasj románav. Juohkka váhko sån galggá rádjat sulá låge tjáledum A4-biele suv juohkusij moalggema diehti. 

– Gå mån lidjiv nuorap mån tjálliv gå lij hállo. Dat manáj vuolus bajás ájgge milta. Dat ij la álu dav la mielan, så dal la bakku dav njuolggit. Guokta biele bäjvváj sån la mierredam tjállet. Jus sån gatset sån låhkå oanegattjav. Dat la, sån javllá, buoremus vuohke vat mannuj bessat. Dat álu vaddá juoga mielav.  

– Gå mån lidjiv nuorap mån låhkiv ålles ájge ihkeve ålov girjev. Dáj maŋemus jagijt mån iv la gärggam, valla dálla mån gähttjalav vaden låhkåt oanegattjav juohkka ideda. Lågos riegádahttá tjállemav munji.  

MOA VUOJTE novella namma l Unna ruoppsis goajkko. ”Gielalasj álkkudagájn ja dåbdojn giehttu Moa Backe Åstot smájvvát…” tjállá jurru giese miessemärkkomsubttsasa birra aktan stuor vieljajn ja áhkojn, gånnå Ella dåbddå ietjas boaston ja ålggobielen:

“Ella tjuottjoj ja ja jiláj dasik áhkko låbdij ruoddehárpov alebut sunji, ja Ella biegij. Ålgoldisbivtas vavdaj ruovddehárppuj, båkså duolvaj rusjkugin. Márjju vijmak galgaj vuojnnut at sån lij akta sijájs. Ella aŋádij áhkos giedav, gå sån iesj, lij juolgij nali bessam, ij diehttástallam; áhkko álu iesj bierggij”.

Unna ruoppsis goajkko almoduváj julevsábmáj Nuoratin 4/18 ja gávnnu dárruj Nuorata ruoptobielen.

– Dat dåbdduj nåv buoret ja njuolgga låhkåt novellav gå lij jårggålum sábmáj. Giella sisadná nåv ålov munji ja gullu dale dan gárddáj. 

Moa sihtá tjállet tjáppagirjálattjat sábmáj boahtte ájge. Dálátjij sån dahká dav biejvvegirjen.

– Danna mån tjáláv majt mån dagáv ja iv dárbaha ussjolit gávnnat karakterav ja giehtov. 

Mån lijkkuv tjállet aktavuodajs ja garra dåbdojs. Dat dåbddu Ihkeve persåvnålattjat juska sisadno ij la muv birra. Álgos dat máhttá, sån javllá, gassjel dibdet iehtjádijt låhkåt, juska gájka la råhttidum ilmmes. Moa bagádus la at dåssjå åvtåv, gen nali luohtet, dibdet låhkåt duv tjállagijt. Jali farra nuppe láhkáj, ádnot soabmásav gev ij åvvå dåbdå, degu dal facebookjuohkusin Tjálle åhtså låhkkegähttjaliddjev.   

 

TJÁLLE PIA SJÖGREN GÅVVÅ REBECCA LUNDH

 

TJÁLLEBAGÁDUSÁ 

1. Tjále mav sidá. Juo diehttelis, dav oadtju háddidit. Juonná dav maŋenagi gávnná ietjas jienav. 

2. Lågå ålov, ihkeve ålov.

3. Ságasta iehtjádij gudi tjálli.

LÅHKÅMBAGÁDUS 

– Mån mielajn lågåv girjijt ma sisadni nuorajt ja aktavuodajt, dála l moadda låhkåmbagádusá:

Gájkka girje majt Ann-Helén Laestadius la tjállám. Mån vattáv dunji biejvev Jandy Nelsonis. Degu náste iján Jennifer Nivenis. Dån, ber Anna Ahlundas

GULLDALIMBAGÁDUSÁ

– Gå mån tjáláv mån åvvå álu gulldalav Sofia Jannokav. Gå sån lávllu sábmáj ja juojggá de mån boadáv dan sáme dåbdduj ja ussjolibmáj.